မနက်ပိုင်း မိုးလင်းကတည်းက ကြားနေရတဲ့ အသံကလေးက တူးပို့ တူးပို့ ဆိုတဲ့ သီချင်းသံလေး။ ဒီသီချင်းကလေးဟာ သင်္ကြန်မိုး ရုပ်ရှင်ဇတ်ကားထဲက သီချင်းကလေးဆိုတာ လူတိုင်း သိကြတယ်လေ။ မကြီးတို့တစ်တွေ သင်္ကြန်မိုးရုပ်ရှင်ကို ဘယ်နှစ်ခေါက်မှန်းမသိ ပြန် ပြန်ပီး ကြည့်မိကြတယ်။ ကြည့်မိတိုင်းလည်း ရိုးသွားတယ်ဆိုတာ မရှိဘူး။ အခုချိန်ထိလည်း ပြန်ကြည့်ချင်တဲ့ စိတ်ကလေး ရှိနေတုံးဘဲ။ သင်္ကြန်မိုးသီချင်းခွေရဲ့ မြူးကြွ မြိုင်ဆိုင်နေတဲ့ အသံကလေးတွေဟာ ဘယ်တော့မှ ရိုးအီသွားတယ်ဆိုတာ မရှိဘူး။ သင်္ကြန်နဲ့ သင်္ကြန်မိုးသီချင်းခွေနဲ့ဟာ ဘယ်လိုမှ ခွဲခွာလို့မရတဲ့ဟာပါ။ သင်္ကြန်မိုးသီချင်းခွေ စပေါ်တော့ မကြီးတို့တစ်တွေ နားထောင်ကြတယ်။ အဲဒီထဲမှာ ထူးခြားတဲ့ စာသားလေးက တူးပို့ တူးပို့ဆိုတဲ့ စာသားလေးကို သတိထားမိ လိုက်ကြတယ်။ ဘယ်သီချင်းမှာမှ မတွေ့ဘူးတဲ့ စာသားလေးလေ။ ညီမလေးတစ်ယောက်က မေးတယ် တူးပို့ဆိုတာ ဘာလဲတဲ့။ မကြီးတို့တစ်တွေမှာ တော်တော်လေး ဦးနှောက်စားတယ်။ မြည်သံကို အစွဲပြုပီး ရေးထားတာ ဆိုပေမဲ့ တူးပို့ဆိုတဲ့ မြည်သံကို ဘယ်ဟာကိုတီးလို့ ထွက်လာတဲ့ အသံပါလို့ ပြောပြဘို့ မသိဘူးဖြစ်နေတယ်။ မြည်သံနဲ့ ကာရံနဲ့ကိုက်အောင် ရေးထားတဲ့ စာသားလေးလို့ မကြီးထင်တယ်လေ (အခြားလေးနက်သော အဓိပ္ပါယ်များရှိရင် ခွင့်လွှတ်ပါ မကြီးရဲ့ ညံ့ချက်ဘဲ ဖြစ်ပါတယ်)။ ညီမလေးကလည်း ပေါက်ပေါက်ရှာရှာ သူမို့လို့ မေးတတ်တယ်။ အဲဒီတုံးက တူးပို့ဟာ ဘာသံလဲလို့ ပြောဘို့ရာ မသိခဲ့ပေမဲ့ နားထောင်လို့တော့ တော်တော်ကောင်းတာဘဲ။ အခုထိလည်း နားထောင်လို့ ကောင်းတုံးဘဲ။ ဒါပေမဲ့ ဘာကိုတီးလိုက်လို့ တူးပို့သံထွက်လာတယ်ဆိုတာ မကြီးပါချူးလည်း အခုထိ မသိသေးဘူး။ ဒါဟာ မကြီးပါချူးရဲ့ အနုပညာမှာ မျက်စေ့မရှိမှုပါ။ သူငယ်ချင်းတို့သိရင် မကြီးကို ပြောပြကြပါနော်...........
No comments:
Post a Comment